Latest update February 1st, 2025 6:45 AM
Dec 05, 2008 Dem Boys Seh, Features / Columnists
When blind man seh that he gun pelt you he already got brick in he hand. That always happen when people get vex and dem know that is only time before things ketch up with you.
That is wha happen wid some of de people who always believe that dem can mek a hustle. Tek de man who snatch a woman chain outside Stabroek Market.
He had to be doing this thing all de time and get away wid it. This time he get ketch because dem had nuff people and police in de area.
De man get ketch and a sound beating. When de magistrate ask he why he do it he tell she that he hungry and he ain’t wukking.
Well if he hungry and he snatch de chain, he can’t eat it suh he had to stay hungry till he sell de chain and de longer he tek fuh sell it de cheaper de chain gun get.
Well he deh at a place wheh he getting he meals up do date but is no cook shop. He can’t place an order. Is either he eat wha he get or starve.
This Christmas nuff of dem mean to try dem hand but dem ain’t know who watching. De man next to dem might be a policeman and is real hell if de snatch tek place then. Unless de policeman deh pun runnings and he getting a share.
And Robeson Benn tek over de Housing Ministry. But he also got de Works Ministry. Now when people wukking dem got to get pay. If de man was doing one Ministry he get pay fuh one.
Dem boys want fuh know wha happen when he got to wuk at two Ministries. De way things going it look like that he gun get two pay. In any case he acting, just like more than half of de people in de country.
De Chancellor acting, de Chief Justice acting; nuff judges acting; de Police Commissioner acting; de Chief Magistrate acting; de Town Clerk acting; de City Treasurer acting. It look like Guyana is Hollywood.
People seh that even Bharrat acting like if he fed up wid some of dem Ministers and now he preparing to start a movie. It gun name ‘Beat out’ because Bharrat busy beating out some of dem Ministers.
He holler pun Nawbatt and de man run to Brazil. Jeffrey ain’t sure wheh he want to run and de Attorney General running home.
De movie gun be filmed at Office of de President wid a supporting cast of people who use to be Ministers and who sitting down mekking money now.
Then there will be the movie called ‘Bluff’. In Parliament de other day some opposition members of Parliament decide to ask about radio and television fuh de rest of de country.
Fuh a lang time only de government got radio and people feel that this is discriminating against others because is only one set of views dem have pun radio.
De discussion get hot and people start fuh call one another dishonest and scamp and people start fuh call fuh help. De poor Speaker just sit and watch dem. Then to avoid confusion, de government announce how it gun free up radio and television.
Well C.N. Sharma decide that he gun apply fuh two radio station; Rex apply fuh one and dem boys ask fuh one.
Dem line up outside de National Frequency Management Unit because dem expect that de thing was happening now.
When de man tell dem that dem have to wait dem boys announce right away that is bluff and de radio and television licence gun only free up when de state radio bruck down. Imagine Thursday de other radio station playing music and in de background somebody playing ping pong.
Dem boys was waiting fuh hear somebody cuss but that didn’t happen. It coulda been a man bouncing a ball and playing inside de station.
Something like that happen when de announcer cuss and he get fire, but only fuh a time because dem don’t have too much people to choose from. Dem fire Morano and tek he back; dem fire this body and tek he back. Is sheer recycling.
Talk half. Lef half.
Feb 01, 2025
2025 CWI Regional 4-Day Championships Round 1… Kaieteur Sports-A resilient century from middle-order Kevlon Anderson coupled with 9 wickets from off-spinner Richie Looknauth saw the Guyana Harpy...Peeping Tom… Kaieteur News-It is peculiar the way the PPP/C government often finds itself staring down the barrel of... more
Antiguan Barbudan Ambassador to the United States, Sir Ronald Sanders By Sir Ronald Sanders Kaieteur News- The upcoming election... more
Freedom of speech is our core value at Kaieteur News. If the letter/e-mail you sent was not published, and you believe that its contents were not libellous, let us know, please contact us by phone or email.
Feel free to send us your comments and/or criticisms.
Contact: 624-6456; 225-8452; 225-8458; 225-8463; 225-8465; 225-8473 or 225-8491.
Or by Email: [email protected] / [email protected]