Latest update February 12th, 2025 8:40 AM

Guyana's largest selling daily and New York's most popular weekly

Latest News

De country is one big circus

Sep 19, 2008 Dem Boys Seh, Features / Columnists

Old people always seh dat monkey know which limb fuh jump pon. Li’l boy does pick pon ole people because dem know dat ole people cyan run and catch dem. Man does beat woman because he know dat she cyan respond till she bun he when he sleeping.
Dem boys seh dat a man and he woman had a good fight and he beat she. He mek de mistake fuh sleep and de next thing dem know, de whole village wake up. De man bawl like a cow when de hot oil land by he ears.
Well de other day Bharrat had a chance to pick pun Venezuela because dem decide to fly two bombers over Guyana. He decide dat he ain’t getting involve in big country story. And he smart because de same way how big people does ignore li’l children is just so Venezuela woulda ignore he.
But de story sweet till dem boys still laughing. Dem boys seh dat dem bombers does fly so high dat people can’t even see dem from de ground. Poor Guyana ain’t even got radar to see anything like dem country dat got radar dat can see anything dat enter dey country.
Some years ago a Korean commercial jet enter Russian airspace, some people claim dat it was by accident but de Russians see it from wheh dem been and dem send up jet fighters. Believe it or not, dem jets shoot down de plane and nearly 200 people dead.
Guyana, even if dem see a plane, cyan do nutten because dem don’t have nutten dat can threaten de plane. Dem boys seh dat de only way de country woulda know dat bombers deh overhead was when de bombs dun land and by then de people dead.
Is a good thing dat Guyana ain’t seh nutten bout de Russians because dem boys seh dat a bomb mighta fall by accident and if it did land by de seawall den is de whole Georgetown woulda gone.
Den dem boys notice dat de PPP claiming dat de PNC got acrobats; how dem tekking one position one days and then dem somersault de next. Dis is one old story. De PNC use to tell de PPP dat it got acrobats and now de PPP telling de PNC de same thing.
Well according to dem boys, if both of dem is acrobats den de country is one big circus because all two of dem actually lead de country and dat is why de people doing best when dem deh outside looking in and laughing. Dem must be telling people dat de country got plenty clowns.
Tek de case of Lincoln Lewis. Some men go to he house and dem try to get in, only Heaven knows why. When dem fail de fuss time dem go away but dem come back when Lincoln tun off de security lights.
De man get frighten and somehow he get out de house and run down a dam. Dem boys want to know how he run because he ent fit and he certainly ent a spring chicken. He can’t even run 10 yards, dem boys seh, and if he try to run 15 he gun drop down.
Well he tell dem reporters how when he run pun de dam a car drive behind he but it didn’t try to knock he down. One man seh dat if was he then he woulda tun back and gaff wid de men and go back home.
But it frightening. Imagine a man got to run from he house. Dem boys seh dat is a good thing he does sleep wid clothes because he woulda look a sight naked in de streets.
He ain’t de only one who had to run. A sugar truck tun over at a time when sugar short. Was Christmas in September at Goed Fortuin because people who didn’t have a drop of sugar end up wid couple pounds well. People come out like ants and even school children going home dump dem school books and fill dem book bag.
De man who own de sugar try fuh shoot up in de air and some people run but dem had a set who decide dat dem rather dead. Dem keep collecting sugar and de owner start fuh cry.
Tonight people was still mekking porridge and sugar cake and ting like dat. One man even start fuh sell because he claim dat he got to mek a profit fuh he efforts. He claim dat he had to fetch sugar and he shoulder sore.
Dem had some people at Bourda market who was trying to get sugar fuh weeks. Some of dem ketch taxi and go to Goed Fortuin. Some meet late and dem vex dat dem spend money fuh nutten.
GuySuCo claim how dem done get pay and dem ain’t got business but is dem people who was to get dat sugar from Uitvlugt. Dem got to drink brackish tea and dat ent a nice thing.
Talk half. Lef half.

Similar Articles

The Glenn Lall Show|| February, 10th, 2025

Follow on Tik Tok @Glennlall

THE BLUNT OF THE DAY

Sports

Ministry of Culture, Youth and Sport endorses Mashramani Street Football Championships

Ministry of Culture, Youth and Sport endorses Mashramani Street...

Feb 12, 2025

Kaieteur Sports- The Ministry of Culture, Youth and Sport (MCY&S) will substantially support the Mashramani Street Football Championships ahead of its Semi-Final and Final set for this Saturday...
Read More
Guyanese boxers shine in IBA World Rankings ahead of Caribbean Championships

Guyanese boxers shine in IBA World Rankings ahead...

Feb 12, 2025

Motie returns for Day/Night affair, as fired-up Harpy Eagles eye 3rd straight win

Motie returns for Day/Night affair, as fired-up...

Feb 12, 2025

Daniel Singh pockets East Bank Pool crown

Daniel Singh pockets East Bank Pool crown

Feb 12, 2025

Khalil, Pollard and Barker reign supreme as BCQS Int’l Masters concludes

Khalil, Pollard and Barker reign supreme as BCQS...

Feb 11, 2025

Cricket West Indies passes historic governance reform at special meeting of shareholders

Cricket West Indies passes historic governance...

Feb 11, 2025

Features/Columnists

Publisher’s Note

Freedom of speech is our core value at Kaieteur News. If the letter/e-mail you sent was not published, and you believe that its contents were not libellous, let us know, please contact us by phone or email.

Feel free to send us your comments and/or criticisms.
Contact: 624-6456; 225-8452; 225-8458; 225-8463; 225-8465; 225-8473 or 225-8491.
Or by Email: [email protected] / [email protected]

Weekend Cartoon

Bridge Watch

Demerara Harbour Bridge

> Berbice Bridge […]