Kanaima mess up Carifesta

Aug 29, 2008 Dem Boys Seh, Features / Columnists

Is a long time people know dat dead is big business. Old people seh dat dead is one thing dat people got to do.

The other thing is dat dem got to eat and dat is why people come from China and set up all dem cook shop. And if is not Chinee is all dem other place dat selling food, even de roadside vendors.

Well dem boys seh dat de dead business is so good dat City Hall trying to privatize de cemetery. When de news buss was big story. People begin to put in tenders. One came from de people who get a big complex.

Dem boys seh dat when City Hall had de inspection de potential investors tun up. De fuss thing dat greet dem was a man rotting by de gate.

Right away de word went out dat de New GPC could produce a formula to keep de body from smelling just like how it produce something to keep mosquito away.

De man who own de Waterfalls paper seh dat he could find use fuh dem end roll from de press because he could produce something to wrap up bodies.

Dem junkies seh dat dem could mek a small change because all dem have to do is pick up de bodies and tek dem to Sandy’s.

Up comes Hammy and announce dat City Hall could actually mek a dollar but dat de government got to help wid de advance money.

But Bharrat tell dem he ain’t going down dat road because one Richard Van West Charles actually did plan to build crematorium wukking wid electricity.

Was GPL who hambug de deal, because de power company claim how it can’t guarantee electricity during a cremation. Well dem boys start fuh imagine a body bunning and then de power shut down, leffing de job half done.

But dat ain’t de only thing dat lef half done. Dem Amerindian people come from de interior to show people how dem does mek canoe. Well people got to wait. Dem claim how de wood dat dem was bringing sail away right from under dey eye.

One li’l child swear dat the piece of wood get up and run away. De Village Chief went running after it and he ain’t come back and de GDF can’t send a search party looking fuh he and de wood because dem busy looking after Carifesta.

Dem boys believe dat Kanaima ketch de people who went looking fuh fresh wood. It woulda be hell if Kanaima was suh vex dat he go to Carifesta looking fuh de wood. Dem boys believe dat is he who collect de fuss piece dat de people can’t find.

Dem boys seh dat dem surprise dat de cassava dat de people was bringing to mek cassava bread ain’t run away too. De problem is dat things in de bush don’t like to come to town. Even wood frighten because of de crime situation.

Anyhow, Carifesta come and people fuhget all dem worries. Some of dem going to de Cultural Centre fuh de fuss time because dem don’t have to pay.

People walk long distance fuh see some presentation and some even go to de Playhouse and if Bharrat call an election now he gun win because everybody see how he bring entertainment to dem and give dem something to do.

Even dem gunman checking out Carifesta because it give dem something to do. Of course dem keeping an eye on who to rob, but de security tight. De only people who ain’t fuhget is dem sugar workers. Dem ain’t care if de country suffer.

But dem have something dat happen and plenty people ain’t know. A reporter wukking wid Guyana Times write a story about de Carifesta opening. He loss he wuk because he tell de truth in a paper dat seh dat it is de beacon of truth.

Dem boys want to know if dem have plenty truth and one set fuh one time and another fuh another time.
And talking about time, before Carifesta everything had a new time.

If a concert fuh begin at nine it begin at 11. Well de Guyanese turning up early now because dem know if dem late is out like south.

And dem behaving. People saying thanks and please and good day. Dem boys surprise. A lady go in a minibus and seh “Please dress down.”

De man watch she and stretch he mouth. De cussing still going on and de visitors want to know if dat is another Carifesta display.
Talk half. Lef half.