Dem boys seh - Don’t send de boss fuh buy nutten

Dem boys seh – Don’t send de boss fuh buy nutten

May 16, 2008 Dem Boys Seh

When a bug bite you, you does really scratch and of late, bug biting a lot of people. One bite Da Silva and he call a press conference. De whole issue was a li’l thing. Buddy sell he hotel and is he business.
Dem boys seh that if a man want sell anything, even if is he wife, is he business. Buddy selling is he business but news people like to know that dem know everything and since is de biggest hotel in Guyana it had to mek de news. De Big Market paper had a reporter who live in St Maarten and she interview de man who buy it.

Up jump Da Silva. He claim how he doubt that de gyal talk to de man, how he doubt that she even know de man and things like that. He write to de press association to complain and to investigate. Is then shame bush pop up.

De gyal had information that only if she did talk to the man she coulda know certain things and when de Waterfalls paper call Bharrat he confirm that he did talk to de man in Guyana. There and then Da Silva shoudla back off but as dem boys seh, is either he didn’t read de Waterfalls Paper or he did done mek up he mind fuh attack de Big Market paper.

Lo and behold, de next day de man who buy e hotel write a letter and he seh that de gyal did talk to he and she even mek he read de article. Well is more shame because dem boys want to see if de press association guh write to Da Silva.

But that ain’t de only problem. Dem boys seh that Mitta Sharma get a big blow when dem attack he station and shut it down fuh four months. He claim how he losing money but even de devil got a friend. Dem other television stations decide to help out. De man keep mekking money.

But wha mek dem boys jump was when dem see de man driving two days after he cry how de government cripple he economy. Was a fire tail Prado, brand new and smooth. Dem boys seh that a Prado cost about $12 million and Mitta Sharma got one. But he paying he staff and is alright because de staff like he bad.
All of dem ignore de offer from Bharrat fuh go and wuk wid he and that is a surprise because dem vote fuh de same Bharrat at de last elections. Is a case of come see me but don’t come live wid me.

Dem boys also see how de Sanata deal mek people behave like if bug bite dem. As far as dem boys know Bobby Ramroop paying good money but de problem is that people feel that he ain’t paying enough. When de year done, though, he paying a good $50 million in rent.

Nuff people don’t even wuk fuh that in a lifetime but people still claiming how de rent small and that de man get a bonus. Well dem boys want de same bonus and de begging fuh anybody to give dem a $50 million bonus every year.

Dem have some people who never even see one million. And wha mek things more sweet is that de man gun repair all dem building in de compound. But nuff people behave like if bug bite dem when de criticisms start. People stop talking to people and some of dem even start fuh cut dem eye. One man cut he eye and it stick pun de side. Now dem calling he cock eye.

But de boss man fuh de Waterfalls paper tek de cake. Three years ago, at Christmas, he wife send he fuh buy some soft drinks because wha dem had in de house run out. He lef and go. Was around 10 de morning. He ain’t return till two de next morning—drunk.

De other day de wife ask he fuh drop home de maid. He willing suh he drop home de maid but he ain’t go back home till near midnight. He drunk again. There and then de wife tell everybody not to send this man anywhere because he gun disappear. And if he wasn’t a man who got a few cents the police woulda lock he up fuh getting away wid people thing.

Two nights ago, he neighbour dead and de family decide that dem gun buy some biscuit fuh a li’l wake.
Dem gun want rum fuh tonight and guess who somebody might send.
Talk half. Lef half.