Dem boys seh...Wha Rohee mek? Lab or labba?

Dem boys seh…Wha Rohee mek? Lab or labba?

Apr 06, 2015 Dem Boys Seh, Features / Columnists, News

Rohee mek a big noise when he open a $400-plus million lab at Turkeyen. He seh that wid dis lab de police gun solve all dem crime.
Now dem boys want fuh know if is a lab or a labba. Dem got nuff unsolved murder. Dem still got to spend millions of dollars overseas fuh do tests that de Rohee labba shoulda been doing.
And fuh mek matters wuss, dem had a fire. Dem boys want fuh believe dat is a cook house because when dem check, somebody tell dem that Rohee was roasting de labba fuh he and Donald.
He and See-all end up eating out de labba and Donald ain’t get none. Dat building give away $300 million out of de $400 million of de taxpayers money wha dem seh dem spend.
Dem give away more than $30 million of de $46 million wha dem seh dem spend pun de Number 51 courthouse. Every house owner who build house in Diamond, and all over spend less than $10 million pun something of de same size.
Dem give away Guyana too. Bai Shan come from till in de last part of China (Inner Mongolia) and become de third largest claim grabber in Guyana overnight.
De way Jagdeo and Donald share out de tax dollars and assets, some people want fuh know if dem own anything.
De Waterfalls boss man going to de Registry to check if he still own de paper. De amount of things—money and assets— Babbie get from Jagdeo, de boss man frighten he wake up one morning next week and hear that he nah own de Waterfalls paper; that somebody give it away and lock out he and de staff.
Of course, de promise follow de giveaway and is part of de manifesto. Since 2011 dem promise Local Government Elections. Dem promising again.
Dem promising to fight corruption; dem promise to be transparent, dem promise procurement commission, dem promise accountability yet dem refuse to set up de IFMAS fuh ketch dem when dem thief.
Dem boys seh dat dis is de biggest laugh since Cheddi dead. De people in deh fuh more than 20 years. Dem boys want fuh know who gun believe that dem gun keep these promises if dem go back. Not even an idiot with half a brain and one ball gun believe that absurdity.
Talk half and mek fresh promises.