Dem boys seh...Fleas teaching at QC

Dem boys seh…Fleas teaching at QC

Nov 27, 2012 Dem Boys Seh, Features / Columnists, News

Wha don’t happen in a year does happen in a day. QC is a case of that. De school been in existence fuh 168 years and never a day it had to share a school wid anybody till a boy set it afire couple years back. Dem correct that situation. Now it got to share a building again.
De children claim how flea chase dem out of de building. De teachers dem refuse to talk and dem tell de children don’t talk. Dem boys did believe that is de teachers got flea and dem shame to let people know. Is when dem children claim how dog and cat tek over de school that people understand.
But from de time de school open dem boys expect this to happen. Dem see couple dogs wid tie lining up at de gate.
De teachers had to see this too but somebody believe that if dem let in de dogs quietly and mek a raise from dem nobody wouldn’t know. Now dem understand de saying that if you play wid de puppy de flea gun bite you.
Things shoulda never reach this situation. De people in de Education Ministry claim how de exterminator tackle de fleas three times and nutten ain’t happen. It got to be that dem was using perfume.
De truth is that de fleas now teaching at de school.
But de harsh fact is that when people lef a situation to go unnoticed things like these does happen. Long time Cleaners use to do dem wuk. Fuh 167 years fleas couldn’t tek over de school. One year dem let in de dogs and de cats and is serious trouble.
People got to understand that you don’t play wid sanitation and you don’t play with people children.
Dem boys seh that since de headmistress want keep de situation quiet dem should mek she stay in de school till de situation get corrected and if she holler one time then she was only bluffing about keeping quiet.
Talk half and wait fuh de rest of de action.