Dem boys seh...Irfaat can talk crap

Dem boys seh…Irfaat can talk crap

Mar 29, 2012 Dem Boys Seh, Features / Columnists, News

One of de most annoying thing to happen is when mosquito singing in you ears. A man tek he wife fuh a mosquito because she deh singing in he ears and lash she pun she mouth wid a mosquito zapper and buss she lip.
De woman nagging all de time and he begging she fuh done; to shut de truck up. She nah hear. He see a tin of Baygon pun de wall but he seh in he mind “nah boy; she might dead.” That is how he use de zapper and end up in court.
Irfaat want somebody use a mosquito zapper pun he lip too. He guh to Essequibo and tell some people who can’t read and write that blue water and white sand is not beach. And de Chronicle and Rum Atar report that.
Irfaat seh that beach is wha we got in Guyana at Number 63 and Shell Beach and Saxacalli. De man seh that Guyana got beach wha does talk. All of dem does tell dem own story. Dem boys seh that dem plan fuh put he pun two of he beach.
One fuh he tell he story about a certain house and de other one somebody tek a zapper and lash he pun he mouth fuh talking crap. Anyhow he know bout beach because he and he kavakamites, including Bad Jenny and Rob Bert does deh pun Parika beach picking pepper.
Dem minibus touts does see dem and bring message to dem boys at de Waterfalls paper.
A woman drop a dead baby with one of dem who use to bring de message. Dem boys plan not to see he again.
As soon as somebody come dem tout like grab de person and drag dem to de minibus. De woman did waiting fuh he. Dem boys seh that she guh specially fuh wait fuh any tout. She didn’t have to wait long. One of dem come up and grab de bag. He ain’t even ask de woman if she travelling.
When de woman walk away de tout open de bag fuh see wha de woman lef. He nearly dead. Was a dead baby. He now trying fuh convince de police that de baby is not he own. Dem boys seh that is Irfaat baby.
Talk half because is problems wid de other half.